როგორ შევარჩიოთ სამზარეულოს ნიჟარა

ჩვენი რეკომენდაციები ითვალისწინებს სამზარეულოს ნიჟარის შერჩევას ფუნქციონალობის, გამძლეობის, დიზაინისა და ეკონომიურობის თვალსაზრისით.

სამზარეულოს ნიჟარის ფორმა და ზომები

რემონტის იმ ეტაპისთვის, როდესაც სამზარეულოს ნიჟარის შეძენის დრო დგება, რასაკვირველია, აღებული უნდა გქონდეთ ზომები და შერჩეული - ფორმა, იმ მახასიათებლების მიხედვით, რაც თქვენთვის მისაღებია.

ოთხკუთხედი ნიჟარები

ზომების ნაირსახეობა: 50х50 სმ, 60х60 სმ.

დახასიათება: ჭურჭლის რეცხვისთვის კომფორტულია, ტევადია. ოთხკუთხედი ნიჟარების ასორტიმენტი კი საკმაოდ, მრავალფეროვანია - როგორც დიზაინით, ასევე ფუნქციონალობის და ფაქტურის თვალსაზრისით.

მართკუთხედი ნიჟარები

ზომების ნაირსახეობა: 55х50, 50х80, 50х100, 50х125.

დახასიათება: მოხერხებულია, კარგად ერგება ვიწრო სამუშაო ზედაპირს. გაითვალისწინეთ, რომ გრძელი მხარე განივად უნდა მოთავსდეს სამუშაო ზედაპირზე, წინააღმდეგ შემთხვევაში, მოუხერხებელი იქნება ექსპლუატაციაში.

მრგვალი ნიჟარები

დიამეტრი: 45-51 სმ.;

დახასიათება: რეცხვა/წმენდა გაცილებით მოსახერხებელია, რადგან მას კუთხეები არ გააჩნია. ამასთან, ასეთი ფორმის ნიჟარა უფრო ტევადია, ვიდრე მართკუთხა, თუმცა, უმეტეს შემთხვევაში, არ აქვს დამატებითი სექციები.

არასტანდარტული ფორმის ნიჟარები

სამკუთხედის ფორმის სამზარეულოს კუთხის ნიჟარა იდეალურია იმ შემთხვევაში, თუკი სივრცის ეკონომია გჭირდებათ. ხოლო, დღესდღეობით, ყველაზე თანამედროვე და მოდური, ხუთკუთხედის ფორმის ნიჟარა ტევადობითაა გამორჩეული. იმის გამო კი, რომ შექმნილია გვერდითა ფრთების ხარჯზე, მონტაჟდება კუთხეშიც, კედლის გასწვრივაც და, ერთი სიტყვით, საუკეთესო არჩევანია დიდი ფართობის სამზარეულოსთვის.

ნიჟარის ოპტიმალური სიღრმე:

სიღრმისთვის 16-20 სმ ოქროს შუალედია, უფრო ღრმა ნაკლებად მოსახერხებელია, რაკიღა ჭურჭლის რეცხვის დროს გადახრა მოგიწევთ. დიდი სიღრმის ნიჟარა იმ შემთხვევაში გამოგადგებათ, თუკი სისტემატურად გიწევთ დიდი ზომის ქვაბების, საცხობი თუნუქის ფურცლების ან დიდი თასების რეცხვა.

ასევე მოუხერხებელია 15 სმ-ზე ნაკლები სიღრმე.

თუმცაღა, უნდა აღინიშნოს, რომ პატარა ზომის ნიჟარა, რომელიც პატარა სამზარეულოსთვის არის განკუთვნილი, მცირე მოცულობას სიღრმით აკომპენსირებს.

სამზარეულოს ნიჟარის მასალა

სამზარეულოს ნიჟარების მრავალი ნაირსახეობა არსებობს. საიმისოდ, რომ სწორად შეარჩიოთ თქვენთვის სასურველი მასალა, რამდენიმე დეტალის ცოდნა ძალიან დაგეხმარებათ.

უჟანგავი ფოლადის ნიჟარა

სამზარეულოს უჟანგავი ნიჟარა (ქრომი-ნიკელი) - ყველაზე პოპულარული პროდუქტია. ის ნებისმიერ ინტერიერს უხდება, არ არის ძვირი, მსუბუქია და მექანიკური ზემოქმედებისა და კოროზიის მიმართ მედეგობა ახასიათებს.

უჟანგავი ფოლადი ტექსტურის მიხედვით არსებობს: სარკისებური (პოლირებული), მქრქალი (მატი) და ე.წ. ხორკლიანი.

თუკი ხორკლიანი ზედაპირის მქონე უჟანგავ მასალას შეარჩევთ, ასეთ ტექსტურას ნაკაწრები ნაკლებად ემჩნევა, თუმცა ეს მოდელები, დანარჩენებთან შედარებით, ცოტა ძვირია.

მინუსები: შედარებით „ხმაურიანია“, თუმცა, შეგიძლიათ, უკანა მხარეს, ძირზე, დაამაგროთ სპეციალური, ხმის დამხშობი საფარი; უჟანგავი ფოლადის ნიჟარა, თუკი ის უხარისხო ნაკეთობაა, ადვილად იკაწრება - განსაკუთრებით სარკისებური და მქრქალი ზედაპირები. ამიტომ, გირჩევთ, მხოლოდ, შემოწმებული პროდუქცია შეიძინოთ.

როგორ გავარკვიოთ, რომ მასალად უჟანგავი ფოლადია გამოყენებული? ამ შემთხვევაში ხარისხიანობის შემოწმებას მაგნიტით შეძლებთ. საამისოდ, მაღაზიაში წასვლისას თან იქონიეთ პატარა მაგნიტი და მიადეთ ის სასურველ ნიჟარას - უჟანგავი ფოლადი მაგნიტს არ მიიკრავს.

რაც უფრო თხელი და მსუბუქია ნიჟარა, მით უფრო მცირე ექნება ექსპლუატაციის ვადა. უჟანგავი ფოლადის ნიჟარის მინიმალური დასაშვები სისქეა 0,12 სმ, მაგრამ ასეთი ვარიანტი უფრო გამოდგება აგარაკის ან ისეთი სახლისთვის, სადაც ჭურჭელი ინტენსიურად არ ირეცხება.

თუკი გსურთ, რომ ნიჟარა დიდხანს გემსახუროთ და სამზარეულოს ზედაპირსაც ზუსტად მოერგოს, თქვენთვის ოპტიმალური 2-3 სმ სისქის მასალისგან დამზადებული მოწყობილობა იქნება, ამასთან ერთად, გასათვალისწინებელია ისიც, რომ მძიმე ონკანი, მხოლოდ, ასეთ მასალაზე შეგიძლიათ დაამაგროთ.

და კიდევ ორი ხაზგასასმელი ნიუანსი, არსებობს ორი ვარიანტი:

• უნაკერო - ანუ დამზადებული ერთი ფოლადის ფირფიტისგან და
• ნაკერიანი - ანუ შედუღებული, რომელიც, რა თქმა უნდა, უფრო იაფია.

სამზარეულოს ემალის ნიჟარები

ასეთი მასალები საექსპლუატაციო მაჩვენებლებით მცირედით ჩამოუვარდება უჟანგავს. მექანიკური დაზიანებისას შეიძლება, ემალი აძვრეს და ფოლადის ფენას კოროზია განუვითარდეს, თუმცა, ამავდროულად, ასეთი მასალა ბიუჯეტური ვარიანტია და დიზაინითაც, საკმაოდ, მიმზიდველად გამოიყურება. სააგარაკე სახლისთვის უკეთეს ალტერნატივას ვერ მოძებნით.

სამზარეულოს კერამიკული ნიჟარა

ამ ვერსიას აქვს ფაიანსის (მინერალური მასა, მიიღება გარკვეული ხარისხის თიხისაგან მასში თაბაშირისა და სხვა ნივთიერებათა შერევით) ან ფაიფურის საფუძველი, ზემოდან კი დაფარულია ემალის დამცავი ფენით. ემალი არ იჟანგება და არ იკაწრება. იგი საუკეთესოდ ერწყმის კლასიკური სტილის სამზარეულოს, ასევე - ქანთრის და რეტროს სტილის ინტერიერებს. თუმცა, მასალა სხვაზე გაცილებით მძიმეა, მექანიკური ზემოქმედების მიმართ ამტანობით არ გამოირჩევა და მოითხოვს პროფესიონალურ დამონტაჟებას.

გრანიტის ნიჟარა 

სამზარეულოს ნიჟარები ასევე ხელოვნური ქვის მასალისგან მზადდება - უფრო ზუსტად კი, გრანიტის ნამცეცებისგან (კროშკა), აკრილისგან, აგრეთვე კვარცისა და ხელოვნური მარმარილოსგან.

ქვის, იგივე გრანიტის ნიჟარა მარტივი მოსავლელია, გაცილებით უხმაუროა, ვიდრე უჟანგავი ფოლადისა, ლამაზია, ცვეთის მიმართ საკმოდ ამტანია და უძლებს მექანიკურ დაზიანებას.

მაგრამ მასაც აქვს პატარა მინუსები:

• უნდა მოარიდოთ სიმხურვალეს - მაგალითად, არ უნდა ჩადოთ ცეცხლიდან აღებული, გავარვარებული ტაფა;
• უნდა მოარიდოთ მკვეთრი ფერის პროდუქტებს, წყლის ჭავლის მიშვებისას ფერი ადვილად რომ გასდის - მაგალითად, ჭარხალს;
• გრანიტის ნიჟარა შედარებით ძვირია.

რამდენი სექცია გჭირდებათ - ერთი თუ მეტი?

პატარა ზომის სამუშაო ზედაპირისთვის გამოდგება ყველაზე მარტივი, ერთსექციიანი ნიჟარები. ხოლო ისეთი, რომელსაც ორი სექცია აქვს უფრო ტევადი და ფუნქციონალურია.

თუ გვერდითა ფრთები აქვს,  ასეთი ვარიანტი, დამატებით, სამუშაო ზედაპირს იცავს, რაც ყველაზე ოპტიმალური გადაწყვეტილებაა პატარა სამზარეულოების შემთხვევაში.

თუკი ორსექციიანი  ნიჟარები თქვენს სამზარეულოში ამა თუ იმ მიზეზით ვერ მონტაჟდება, აქაც არსებობს მარტივი გამოსავალი - შეიძინეთ სპეციალური ბადე ხილისა და ბოსტნეული გასარეცხად.