საღებავი ფასადისთვის - რეკომენდაციები სპეციალისტისგან

შენობის ფასადი მთელ ნაგებობას იცავს ნეგატიური გარეგანი ზამოქმედებისგან, ამიტომ ძალიან მნიშვნელოვანია, ფასადი იყოს უმაღლესი ხარისხის. პერიოდულად საჭიროა პროფილაქტიკური სამუშაოების ჩატარება და შენობის გარეგნული იერის განახლება. ფასადის მოსაპირკეთებლად გამოიყენება სხვადასხვა სამშენებლო მასალა. მათ შორის კი ყველაზე ოპტიმალურია ფასადის საღებავი, რომელიც ერთდროულად ორ სამსახურს გაგიწევთ - დაიცავს ნაგებობას და მისცემს ესთეტიკურ იერს.

რომელია უკეთესო საღებავი სახლის ფასადისთვის?

ამ კითხვაზე მოკლე პასუხის გაცემა არც თუ იოლი საქმეა, რადგან:

• ქართულ ბაზარზე დიდი არჩევანია როგორც შემდგენლობის, ასევე ფერებისა და მწარმოებლების მიხედვით;
• სხვადასხვა ზედაპირს - ბეტონს, აგურს, ბათქაშს, ხეს, რკინას - სხვადასხვა შემადგენლობის საღებავი სჭირდება;
• გასათვალისწინებელია იმ რეგიონის კლიმატი, სადაც სახლი მდებარეობს;
• ყურადღებამისაქცევია პროდუქტის ხანმედეგობის გარანტია მწარმოებლისგან.

ამ მოცულობის ინფორმაციამ, შეიძლება, მართლაც დაგაბნიოთ, თუმცა არსებობს ზოგადი წესები, რომელთა დახმარებით ასორტიმენტში გაერკვევით და სწორი არჩევანს გააკეთებთ.

რა თვისებები უნდა ჰქონდეს ფასადის საღებავს:

• ულტრაიისფერი სხივების მიმართ მდგრადობა;
• ნესტგამძლეობა;
• ტემპერატურის ცლილებების მიმართ მდგრადობა;
• ქიმიური ნივთიერებების ზემოქმედების მიმართ მდგრადობა;
• ანტისეპტიკური თვისებები;
• მაღალი ხარისხის დეკორატიულობა.

ცხადია, ყველა საღებავი ვერ იქნება გარემო პირობების მიმართ ერთნაირად მდგრადი და ხანმედეგი. სპეციფიკურ საექსპლუატაციო თვისებებს განაპირობებს საღებავის შემკვრელი ნივთიერება. საღებავის გაშრობის შემდეგ სწორედ შემკვრელი ქმნის მყარ დამცავ საფარს, რომელსაც ახასიათებს მაღალი ადჰეზია ზედაპირთან (ადჰეზია - მასალის თვისება, მიეწებოს მეორეს);

შემაკავშირებელი ნივთიერების მიხედვით იწარმოება საღებავები: სინთეტიკურ ფისის ფუძეზე და მინერალური ნაერთების ფუძეზე.

ფასადის საღებავების შემადგენლობა და საექსპლუატაციო თავისებურებები:

სახლის ფასადის საღებავებს შორის დღეს ყველაზე პოპულარული სახეობებია, საღებავები გარე სამუშაოებისთვის:

აკრილის საღებავი - დამზადებულია აკრილის ორგანული ფისის ფუძეზე, რომელიც არ ინარჩუნებს ჭუჭყს ზედაპირზე, გამოირჩევა ნესტგამძლეობით და ზედაპირზე კარგი მოჭიდებით.  ფერების მრავალფეროვანი პალიტრა კი აკრილის საღებავის პოპულარობის ერთ-ერთი მიზეზია;

სილიკონის ფასადის საღებავი - დამზადებულია სილიკონის ფისის ემულსიაზე. გამოირჩევა მაღალი ელასტიკურობით და თერმომდგრადობით, ამ თვისებების დამსახურებით, საღებავი მკაცრ   ატმოსფერულ პირობებსაც უძლებს. გამოდგება კირქვის, ბეტონისა, ცემენტის და აგურის ზედაპირებისთვის.  სხვა საღებავებთან შედარებით, გაცილებით მოკლე დროში შეიძლება დაიტანოთ ახლად შებათქაშებულ ზედაპირზე - 2-3 დღის დაყოვნების შემდეგ;

სილიკატური საღებავი - პროდუქცია იწარმოება კალიუმის თხევადი მინის ფუძეზე. გამოიყენება ბეტონის, აგურის და ხის ნეგებობების შესაღებად. ახასიათებს მაღალი მდგრადობა ულტრაიისფერი სხივების მავნე ზემოქმედებისა მიმართ, რაც ფასადის ფერის ხანგრძლივად შენარჩუნებას უზრუნველყოფს. თუმცა სილიკატის ნაერთით სამღებრო სამუშაოების დამოუკიდებლად შესრულება რთულია - კედელს საგულდაგულოდ მომზადება სჭირდება. გარდა ტექნოლოგიური პროცესისა, ასევე უნდა იცოდეთ, როგორ იხმაროთ ზუმფარა (შკურკა), საღებავის ამცლელი, შპატელი, ამიტომ ასეთი სამუშაოს შესრულება უმჯობესია, სპეციალისტებს ანდოთ;

ცემენტის საღებავები - უნივერსალურობა და მყარი მოჭიდების უნარი იძლევა საშუალებას, შეიღებოს ბეტონი, ლითონის და ხის ელემენტები. კარგად უძლებს ტემპერატურულ და ატმოსფერულ ცვლილებებს;

კალციუმის კარბონატის საღებავები - გამოყენების წინ იხსნება წყალში. არ ეკარება ობი და სოკო, თუმცა ჭარბი ნალექისა და ძლიერი ქარის მიმართ ნაკლებად მდგრადია. გავრცელებული ფერებია თეთრი და ღია, მქრქალი ტონები.

ფასადის საღებავის მთავარი საექსპლუატაციო თვისებები

საღებავის კონკრეტულ სახეობას თავისი კონკრეტული თვისებები აქვს, თუმცა არის 3 მნიშვნელოვანი პარამეტრი, რომელსაც ფასადის საღებავი აუცილებლად უნდა აკმაყოფილებდეს:

ორთქლგამტარობა - სწორედ ამ თვისებაზეა დამოკიდებული, რამდენად ჯანსაღი გარემო იქნება შენობის შიგნით. საღებავს უნდა ჰქონდეს შენობიდან გამომავალი ორთქლის გატარების უნარი. წინააღმდეგ შემთხვევაში, საღებავის ფენაზე გაჩნდება სოკო, ობი და ჭუჭყი. ორთქლგამტარობის მაქსიმალურ მაჩვენებლად მიჩენულია 130 გ/კვ.მ დღე-ღამეში./ დაკვირდით შეფუთვაზე - რაც უფრო ნაკლებია ეს მაჩვენებელი, მით უკეთესი;

გარემოპირობების მიმართ მდგრადობა - ეს გულისხმობს თავდაპირველი თვისებების შენარჩუნებას სეზონური გარემოპირობების ზემოქმედების მიუხედავად;

ჭუჭყისა და მტვრის ამტანობა - საღებავი ზედაპირზე ქმნის ჰიდროფობურ ფირს, რომლიც ხელს უშლის მტვრის ნაწილაკების შესრუტვას. მტვერი ზედაპირზე რჩება და ადვილად ირეცხება წყლით; ჭუჭყისა და მტვრისგან დაცვის კარგი უნარი აქვს სილიკონის ფუძეზე წარმოებულ საღებავებს. ასეთ ამოცანებს, ასევე, ნორმალურად უმკლავდება აკრილი და სილიკატური საღებავები.

ფასადის საღებავი და ზედაპირის სახეობები

გთავაზობთ მოკლე რეკომენდაციას, თუ რომელი საღებავი უნდა შეარჩიოთ სხვადასხვა ზედაპირისთვის:

ბეტონის ზედაპირი შეიძლება აკრილის საღებავით, სილიკონის საღებავით, სილიკატური საღებავით შეიღებოს;

აგურის ფასადი იშვიათად იღებება, რადგან ესთეტიკური ვიზუალი აქვს, მაგრამ თუკი მაინც გადაწყვიტეთ აგურის კედლის შეღებვა, ამისთვის გამოგადგებათ, მაგალითად: სილიკონის, აკრილის, აკრილ-სილიკონის, სილიკატური, კირქვის საღებავები... მხოლოდ გაითვალისწინეთ, რომ შესაღები აგური ყინვაგამძლე უნდა იყოს.

ლითონი უნდა შეიღებოს ანტიკოროზიული საღებავით, რომელიც მდგრადი უნდა იყოს მაღალი ტემპერატურის მიმართ - ასეთებია, სილიკონის, ალკიდის, აკრილის საღებავები. ზოგ შემთხვევში ასევე გამოიყენება ზეთოვანი, ე.წ. მასლიანი საღებავი, რომელიც დღეს, მართალია, მნიშვნელოვნად ჩამოუვარდება თანამედროვე საღებავებს, თუმცა მისი დაბალი ფასი შესაძლოა, გადამწყვეტი აღმოჩნდეს, თუკი შეზღუდული ბიუჯეტი გაქვთ;

ხის შესაღებად უმჯობესია, გამოიყენოთ სპეციალური ხის საღებავები, აკრილი ან ალკიდური ემალი, აკრილის გრუნტი ან უფერო ლაქები, რომლებიც, გარდა იმისა, რომ ხეს იცავენ, მის ბუნებრივ სილამაზესაც გამოკვეთენ.