როგორ მოვუაროთ ეზოს მწვანე საფარს

მწვანე საფარის მოვლა ის აუცილებელი პროცესია, რომელიც არა მხოლოდ ეზოს ესთეტიკას, არამედ ბალახის ვეგეტატიურ ზრდასაც სჭირდება. 

თქვენი ეზოს „მწვანე ხალიჩის“ მოვლა  ითვალისწინებს ისეთ ღონისძიებებს, რომლებიც ნიადაგს გააჯანსაღებს, საჭირო ტენიანობის დონეს შეუნარჩუნებს და ბალახის ზრდისთვის აუცილებელი საკვები ნივთიერებებით მოამარაგებს.

მწვანე საფარის მოვლის ძირითადი ღონისძიებებია: თიბვა, კრეჭვა დროულად; სასუქების შეტანა; სარეველებთან ბრძოლა; მორწყვა.

გაზონის თიბვა და კრეჭა

მწვანე გაზონის გამძლეობისა და მაღალი დეკორატიულობისთვის თიბვა აუცილებელი პროცესია, რომლისთვის ხელსაწყოების სრული კომპლექტი აუცილებლად დაგჭირდებათ.

ჩვეულებრივ გაზონს (გაზონის სხვადასხვა სახეობა არსებობს) სეზონზე 5-10-ჯერ თიბავენ. თიბვა იწყება ბალახების პირველი ყვავილობიდან და მთავრდება ყინვების დადგომამდე 30 დღით ადრე, რათა ბალახმა საკვები ნივთიერებების მომარაგება მოასწროს.
ბალახი 3-5 სმ სიმაღლეზე ითიბება. ხოლო თუ ახალგაზრდაა - მხოლოდ მას შემდეგ, რაც 15-20 სმ მაინც მიაღწევს.
იმისთვის, რომ ყვავილები არ დააზიანოთ, ყვავილებს შორის გაზონების გასათიბად ბალახის ელექტრო სათიბელა დაგჭირდებათ. 

თუ გსურთ, რომ ხშირი ბალახი გაიზარდიოს და გაზონი ადგილ-ადგილ არ „გამელოტდეს“, კრეჭის დროს შემდეგი რეკომენდაციები გაითვალისწინეთ:

• კრეჭა მშრალ ამინდში ჩაატარეთ. მაგრამ იმ შემთხვევაში, თუკი ბალახი ძალიან გაიზარდა, მოთიბეთ დილაადრიან, როცა უხვად არის დანამული.
• ბალახის ზრდის მიმართულება დამოკიდებულია თიბვის მიმართულებაზე. ყოველი მომდევნო წმენდის დროს შეცვალეთ გაზონის საკრეჭის მიმართულება, რათა „მწვანე ხალიჩა“ თანაბარი და რბილი იყოს. ასევე, ეს დაიცავს მწვანე საფარს „ცარიელი“ ზონებისგან, რომლებიც ქვედა ფენებში იმის გამო ჩნდება, რომ იქ მზის სინათლე ცუდად აღწევს;
• გაკრეჭილი ან მოთიბული ბალახი შეგიძლიათ მოაგროვოთ და კომპოსტი დაამზადოთ, რაც ეფექტიანი ორგანული სასუქია ნიადაგის ნაყოფიერების გასაუმჯობესებლად.
• თუ გაზონი ცხელ დღეებში გაიკრიჭება, შეგიძლიათ, მოცილებული ბალახე ზედაპირზე დატოვთ. ის ხელს შეუწყობს ნიადაგში ტენიანობის შენარჩუნებას.

გაზონის მოვლის საშუალებები

ბაღის მოტო და ელექტრო ხელსაწყოები მნიშვნელოვნად ამარტივებს მწვანე საფარის მოვლას. ამ პროცესის გასაადვილებლად სწორი ხელსაწყო უნდა გამოიყენოთ.

რამდენიმე რეკომენდაცია, თუ როგორ შევარჩიოთ გაზონის საკრეჭი:

• გაზონის საკრეჭი ელექტრომანქანები - გაზონის ელექტრო საკრეჭი, ბალახის ელექტრო სათიბელა და გაზონის სათიბი მანქანა მსუბუქი და კარგად მანევრირებადი ინსტრუმენტებია. ეს აპარატები აბსოლუტური ლიდერები არიან ერგონომიულობის, ეკოლოგიურობის და უსაფრთხოების თვალსაზრისით. გაზონის ელექტრო საკრეჭი შესანიშნავია პატარა და საშუალო ზომის ეზოების საფარის დასამუშავებლად, რადგან ელექტროსადენის გამო მოქმედების რადიუსი შეზღუდული აქვთ;
• გაზონის საკრეჭი ბენზინის ძრავით - ბენზინის გაზონის საკრეჭი ამ თემის კლასიკაა. იგი ძალიან პრაქტიკულია, სამართავად კომფორტულია და ძალიან ბევრი სასარგებლო ფუნქცია აქვს;
• ბაღის მტვერსასრუტი - ეზოს მტვერსასრუტი, როგორც ბენზინის ძრავით, ასევე აკუმულატორით, მარტივად ერევა მწვანე საფარიდან ფოთლების მოგროვებას. აქვს ნარჩენების მოგროვებისთვის სხვადასხვა ფუნქცია. მოგროვებული ნარჩენი კი კომპოსტის გასაკეთებლად გამოგადგებათ.
• ბაღის ხელსაწყოები - ტექნიკური პროგრესის პარალელურად, ხელით მუშაობა, რა თქმა უნდა, კვლავ ძალაშია. ამიტომ საკუთარი ბაღის მოვლისას აუცილებლად დაგჭირდებათ ხელსაწყოები: სეკატორი, ბუჩქის საკრეჭი, ფოცხი, ბარი, ნიჩაბი და სხვა ბაღის ხელსაწყოები.

სასუქების შეტანა

მზის სხივი და სითბო, ჟანგბადი და წყალი - აი, გაზონის ბალახის ძირითადი საკვები. მაგრამ ხშირად ეს ელემენტები საკმარისი არ არის, რათა ბალახი ხასხასა და სასიამოვნო შესახედი იყოს. ბალახი, რომელიც სისტემატურად იკირიჭება, ბუნების მიერ ბოძებული საკვები არ ჰყოფნის - სისტემატურად სჭირდება დამატებითი კვება ანუ სასუქები.

სასუქი შეაქვთ გაზაფხულზე, ზაფხულში და შემოდგომაზე, როცა ბალახის საფარს ზამთრისთვის ამზადებენ. რა რაოდენობის სასუქის შეტანაა საჭირო, ეს ყოველთვის მითითებულია შეფუთვაზე.

იმისთვის, რომ ბალახმა სასუქები კარგად აითვისოს, ნუ შეიტანთ სასუქს ნაწვიმარზე ან წვიმის დროს. უმჯობესია, ისე გათვალოთ, რომ ბალახი მშრალი იყოს, ნიადაგი კი - სველი, ხოლო შემდეგ კი წვიმა მოჰყვეს. თუ წვიმა არ წამოვა, გაზონი თავად მორწყეთ.

სასუქებიდან ძალიან ეფექტიანია: ქოქოსის სუბსტრატი - აძლიერებს ორგანული და მინერალური სასუქების ეფექტიანობას, შავი ბრილიანტი - ბიო-აქტიური ზრდის სტიმულატორია, ტორფის სუბსტრატი და აგრო პერლიტი, რომლებიც ნიადაგის სტრუქტურის გასაუმჯობესებლად გამოიყენება.

გაზონის მორწყვა

მორწყვა ერთ-ერთი მთავარი ელემენტია გაზონის მოვლაში. თუკი წესებს არ დაიცავთ, მწვანე საფარი შეიძლება დაავადდეს და ვეღარც გადაარჩინოთ. მორწყვის პერიოდულობა დამოკიდებულია წელიწადის დროზე და ნიადაგის ტიპზე. 

გაზონი უნდა მოირწყას მხოლოდ საჭიროების შემთხვევაში. თუკი ბალახმა მიიღო მოცისფრო ან ძალიან მუქი მწვანე ფერი, ღერომ კი დახვევა დაიწყო, ესე იგი, მორწყვის დროა.

გაზონის მოსარწყავად ძალიან პრაქტიკული ხელსაწყოა სარწყავი თოფი.

გაზონის მორწყვისთვის საუკეთესო დროა დილა. საქმე ის გახლავთ, რომ დილით ადრე და გვიან საღამოს, უმეტესად, ქარი არ იცის და, შესაბამისად, ტენი არ აოთრთქლდება. გვიან საღამოსაც შეიძლება მორწყვა, თუმცა იშვიათად, რადგან ასეთ შემთხვევაში ბალახი მთელი ღამით სველი დარჩება და შეიძლება, სოკოს გაჩნდეს.

სარეველებთან ბრძოლა

სარეველა არ შეგაწუხებთ, თუკი თავიდანვე საფუძვლიანად ამოძირკვავთ. როცა სარეველას ფესვები ღრმად აქვს გადგმული, შეიძლება მის წინააღმდეგ სპეციალური ქიმიური პრეპარატი გამოიყენოთ. ის გულდასმით უნდა შერჩიოთ, რათა სარეველა ისე გაანადგუროს, რომ მწვანე საფარი არ დააზიანოს.