რემონტის თანმიმდევრობა: რატომ უნდა დააგოთ პარკეტი ელექტროგაყვანილობის შემდეგ და არა პირიქით

წარმოიდგინეთ, რომ ბინის რემონტისას სახლში ძვირადღირებული პარკეტი დააგეთ, მაგრამ მოგვიანებით აღმოაჩინეთ, რომ მოძველებული ელექტროგაყვანილობაც შესაცვლელი იყო. რა უნდა ქნათ? ასეთ დროს იძულებული ხართ, რომ დააზიანოთ ახლად დაგებული იატაკი, გაზარდოთ რემონტის ხარჯები და თან დრო დაკარგოთ. ამიტომ, ამ და სხვა გაუთვალისწინებელი პრობლემების თავიდან ასაცილებლად აუცილებელია რემონტის თითოეული ეტაპის ზედმიწევნით დაგეგმვა და თანმიმდევრულად შესრულება.

დაგეგმვა და დიზაინის შერჩევა რემონტის ყველაზე მნიშვნელოვანია ეტაპებია

რემონტის დაწყებამდე აუცილებლად დაუთმეთ დრო დაგეგმვას. მკაფიოდ განსაზღვრეთ თქვენი მიზნები, სურვილები და პრიორიტეტები, რათა ნათლად დაინახოთ საბოლოო შედეგი.

რემონტის დაწყებამდე უმთავრესია მკაფიოდ ჩამოაყალიბოთ თქვენი ხედვა. რა მიზნებს ისახავთ? გინდათ, სივრცე უფრო ფუნქციური გახადოთ, შეცვალოთ მისი დიზაინი, თუ ორივე ერთად? რა არის თქვენი მთავარი საჭიროებები? მაგალითად, თუ თქვენი მიზანია სამზარეულოს ფუნქციონალურობის გაზრდა, უნდა გაითვალისწინოთ ისეთი ფაქტორები, როგორებიცაა სამუშაო ზედაპირის ფართობი, სათავსოების რაოდენობა და განლაგება, ტექნიკის ერგონომიული განლაგება და განათება. ამ შემთხვევაში, დიზაინი პრაქტიკულობასა და მოხერხებულობაზე იქნება ორიენტირებული.

შემდეგი მნიშვნელოვანი ნაბიჯი ბიუჯეტის განსაზღვრაა. გახსოვდეთ, რომ რემონტის პროცესში ხშირად მოულოდნელი ხარჯები ჩნდება, ამიტომ წინასწარ განსაზღვრეთ თანხის ის ოდენობა, რომლის დახარჯვაც შეგიძლიათ. თქვენს ბიუჯეტში უნდა გაითვალისწინოთ არა მხოლოდ მასალების ღირებულება, არამედ ხელოსნების მომსახურების, დემონტაჟისა და შესაძლოა, ნარჩენების გატანის გადასახადები.

სპეციალისტების რჩევით, გაუთვალისწინებელი ხარჯებისთვის 10-20%-იანი რეზერვი შექმნათ. მაგალითად, თუ რემონტისთვის 20 000 ლარი გაქვთ გამოყოფილი, 1000-დან 2000 ლარამდე თანხა მოულოდნელი შემთხვევებისთვის უნდა გადადოთ. ეს ფინანსური სირთულეებისა და სტრესისგან დაგიცავთ.

დიზაინის კონცეფცია და სტილის შერჩევა თქვენი გემოვნების გამოხატულებაა. იდეალურ შემთხვევაში, ამ ეტაპზე დიზაინერის დახმარება შეიძლება, თუმცა თუ ბიუჯეტი შეზღუდულია, არსებობს ალტერნატიული გზებიც. მაგალითად, ინსპირაციის პოვნა დიზაინის ვებსაიტებზე, ჟურნალებში, სოციალურ ქსელებში (მაგალითად, Pinterest-ზე) ან მეგობრების სახლებშიც შეიძლება. მთავარია, მყუდრო და ჰარმონიული გარემოს შესაქმნელად, სასურველი სტილი და ფერები ზუსტად შეარჩიოთ. მაგალითად, თუ თანამედროვე და მინიმალისტური ინტერიერი მოგწონთ, გაითვალისწინეთ რამდენიმე ძირითადი პრინციპი: შეარჩიეთ სადა ფერები, გამოიყენეთ მარტივი ფორმები ავეჯსა და დეკორში, აირჩიეთ ფუნქციური ავეჯი, რომელიც დამატებით სათავსოდაც გამოდგება. ამ შემთხვევაში, აქცენტი სივრცის სიმარტივესა და ფუნქციონალურობაზე კეთდება, სადაც ყველა დეტალს თავისი დანიშნულება აქვს.

საპროექტო დოკუმენტაციის მომზადება რემონტის მნიშვნელოვანი ნაწილია, რადგან ის მთელ პროცესს ამარტივებს და შეცდომების დაშვების რისკს ამცირებს. გეგმაში დეტალურად უნდა იყოს გაწერილი ისეთი საკითხები, როგორებიცაა: ოთახების განლაგება, ავეჯის ზომები, განათების ადგილმდებარეობა, სანტექნიკის სისტემის სქემა, ელექტროგაყვანილობის გეგმა და სხვა საჭირო ინფორმაცია. დეტალური გეგმით რემონტის პროცესის უფრო ეფექტურად წარმართვას შეძლებთ და  ნაკლები შეფერხებები გექნებათ. 

დაიწყეთ დემონტაჟი და მოამზადეთ სივრცე რემონტისათვის

ხატოვნად, რომ ვთქვათ: ამ ეტაპზე ემშვიდობებით ძველს და სივრცეს სიახლეებისათვის ამზადეთ. თუმცა, ეს არც ისე რომანტიკულია, როგორც ჟღერს. რეალურად, მოგიწევთ ძველი იატაკის, შპალერის, ფილების მოშორება, ავეჯის გამოტანა და ა.შ., რაც საკმაოდ ხმაურიანი და მტვრიანი პროცესია. 

მნიშვნელოვანია აღინიშნოს, რომ მოსამზადებელი სამუშაოების მოცულობა რემონტის მასშტაბზეა დამოკიდებული. ამ შემთხვევაში სრული რენოვაციის მაგალითი განვიხილოთ. 

დემონტაჟი ძველი მასალებისაგან გათავისუფლებით იწყება. ეს ნიშნავს, რომ აშორებთ იატაკის საფარს (მაგ., პარკეტი, ლამინატი, ხალიჩა), კედლის მოპირკეთებას (მაგ., შპალერი, საღებავი, ფილები) და ჭერის კონსტრუქციებს (მაგ., დაკიდული ჭერი, თაბაშირმუყაო). 

გაფრთხილება: ამ დროს მტვერი და ნამსხვრევები წარმოიქმნება, აუცილებელია დამცავი აღჭურვილობის გამოყენება. გაიკეთეთ სათვალე, რესპირატორი, ხელთათმანები და, თუ ხმაურის დონე მაღალია, ყურსასმენებიც. 

შემდეგ ეტაპზე მოძველებული კომუნიკაციების მოშლის დრო დგება: ელექტროგაყვანილობა, სანტექნიკის მილები, გათბობის ელემენტები. ეს საქმე პროფესიონალებს უნდა მიანდოთ, რადგან ელექტრობასთან არასწორმა მუშაობამ შეიძლება დენის დარტყმა, მოკლე ჩართვა ან ხანძარი გამოიწვიოს, მილების დაზიანებამ კი — წყალდიდობა. 

დემონტაჟის შემდეგ სივრცე ნარჩენებისაგან უნდა გაასუფთაოთ და ცვლილებების ეტაპზე გადახვიდეთ. 

რემონტი დაიწყეთ კომუნიკაციების განახლებითა და მოწყობით

ძველი სანტექნიკისა და ელექტრობის სისტემების დემონტაჟი მოსამზადებელი სამუშაოების კულმინაციური ნაწილია, თუმცა რემონტის პროცესში ყველაფერი ამ საქმით იწყება. ეს ლოგიკურია, რადგან სანტექნიკური და ელექტრული სისტემები კედლების, იატაკისა და ჭერის შიგნით იმალება. ამიტომ, მათი მოწყობა და განახლება მოსაპირკეთებელი სამუშაოების დაწყებამდე უნდა მოხდეს, რათა შემდგომში კედლები აღარ დაზიანდეს.

სანტექნიკის მოწესრიგების ეტაპზე მილების გაყვანილობა, ნიჟარებისა და აბაზანის აქსესუარების მონტაჟი ხდება. პროფესიონალების რეკომენდაციით, აუცილებელია, რომ ეს პროცესი წინასწარ განსაზღვრული გეგმის მიხედვით წარიმართოს. იგულისხმება, რომ ყველა სანტექნიკური წერტილის (ნიჟარა, უნიტაზი, საშხაპე, აბაზანა, სარეცხი მანქანა, ჭურჭლის სარეცხი მანქანა და ა.შ.) მდებარეობა და მილების გაყვანილობის სისტემა დასაწყისშივე უნდა განისაზღვროს.

რაც შეეხება ელექტროგაყვანილობის მოწყობას, ამ დროს როზეტები, ჩამრთველები და სანათები მონტაჟდება. მნიშვნელოვანია, რომ კარგად დაგეგმოთ თითოეულ ოთახში საშუალოდ რამდენი როზეტი და ჩამრთველი დაგჭირდებათ. განათების სისტემის დაგეგმვისას კი ყურადღება მიაქციეთ ოთახის დანიშნულებასა — საძინებელში ნაკლები სინათლეა საჭირო, სამუშაო სივრცეში კი უფრო ინტენსიური — და ბუნებრივი განათების ფაქტორს. 

გაფრთხილება: ელექტრული და სანტექნიკის სამუშაოები აუცილებლად პროფესიონალებმა უნდა შეასრულონ, რათა უზრუნველყოფილი იყოს მაქსიმალური უსაფრთხოება და საიმედოობა. 

გაასწორეთ კედლების ზედაპირი და მოამზადეთ მოსაპირკეთებლად

შემდგომი მოსაპირკეთებელი სამუშაოებისათვის, კედლებისა და ჭერის ზედაპირების მომზადება ხდება. ეს კრიტიკულად მნიშვნელოვანი ეტაპია, რადგან ზედაპირის სიგლუვე შედეგის ხარისხს განაპირობებს. 

პირველ რიგში, კედლები  და ჭერი ილესება. ზედაპირზე სპეციალური მასალა ე.წ. ფითხი დაიტანება და მაქსიმალური სიზუსტით სწორდება, რათა თანაბარი და ვერტიკალური (კედლის შემთხვევაში) ან ჰორიზონტალური (ჭერის შემთხვევაში) სიბრტყე შეიქმნას. ეს კეთდება იმისათვის, რომ მოპირკეთების დროს შპალერი, საღებავი ან ფილები თანაბრად განაწილდეს და დეფექტები — ჰაერის ბუშტები და ასიმეტრია — არ წარმოიქმნას. გაითვალისწინეთ, რომ ხარვეზები არ არის მხოლოდ ვიზუალური პრობლემა, შეიძლება ერთი შეხედვით შესამჩნევი არც კი იყოს, თუმცა დროთა განმავლობაში აუცილებლად იჩენს თავს —  შემცირდება ადჰეზია, მარტივად იქერცლება და ჩნდება ბზარები.  

იმ შემთხვევაში თუ გალესვა საკმარისი არ არის ან დეკორატიული ელემენტები, მაგალითად თაროები და ტიხრები ეწყობა, თაბაშირმუყაოს კონსტრუქციების მოწყობა იწყება. თაბაშირმუყაო შეიძლება გამოყენებულ იქნას კომუნიკაციების (მილები, ელექტროგაყვანილობა) დასამალადაც.

მოამზადეთ იატაკი, შეარჩიეთ შესაფერისი საფარი და დააგეთ ის

თუ იატაკი არათანაბარია, სწორი და მყარი ზედაპირის შესაქმნელად, პირველ რიგში, მისი მოჭიმვაა საჭირო. ეს იატაკზე ცემენტის ან ბეტონის ფენის დატანას და შემდეგ გასწორებას გულისხმობს. 

აქვე უნდა დაიწყოთ იატაკის საფარის შერჩევაც. ამ ეტაპზე გასათვალისწინებელია რამდენიმე ფაქტორი: თქვენი გემოვნება, საჭიროებები, ბიუჯეტი და ოთახის ფუნქციონალურობა. ბაზარზე წარმოდგენილია იატაკის საფარის მრავალფეროვანი არჩევანი, რომელთაგან ყველაზე პოპულარული ლამინატი, პარკეტი, კერამიკული ფილები, ვინილის იატაკი და ხალიჩაა.

• ლამინატი - პრაქტიკული და ეკონომიური არჩევანი, რომელიც ადვილად მოსავლელია, შედარებით გამძლეა და დიზაინის ფართო არჩევანი არსებობს. 

ლამინატის მონტაჟი მარტივია, ფასისა და ხარისხის თანაფარდობაც — შესანიშნავი;

• პარკეტი - ბუნებრივი ხის იატაკი, რომელიც თბილ და სასიამოვნო ატმოსფეროს ქმნის. ეს არის ეკოლოგიურად სუფთა და გამძლე მასალა, თუმცა პარკეტს რეგულარული მოვლა სჭირდება და უფრო ძვირია, ვიდრე ლამინატი. სწორი მოვლის შემთხვევაში, ის წლების განმავლობაში ინარჩუნებს პირვანდელ იერსახეს.
• კერამიკული ფილები - წყალგამძლე და ადვილად მოსავლელი მასალაა, ამიტომ იდეალურია სველი წერტილებისთვის (აბაზანა, სამზარეულო). კერამიკული ფილები გამოირჩევა მრავალფეროვანი დიზაინითა და ფერთა პალიტრით, რაც ინტერიერში საინტერესო გადაწყვეტილებების მიღების საშუალებას იძლევა.
• ვინილის იატაკი - თანამედროვე, გამძლე და წყალგამძლე საფარია. მისი ფასი ხარისხის მიხედვით განსხვავდება. კარგი ხარისხის ვინილი ძალიან გამძლეა. 

კედლებისა და იატაკის მოპირკეთების თანმიმდევრობაზე ხშირად ვერც გამოცდილი პროფესიონალები თანხმდებიან. მიუხედავად იმისა, რომ საბოლოო გადაწყვეტილება კონკრეტულ პროექტზეა დამოკიდებული, არსებობს ორი ძირითადი მიდგომა. პირველის მიხედვით, პირველ რიგში, უნდა დამუშავდეს კედლები, ხოლო შემდეგ — იატაკი. ამ თანმიმდევრობის მთავარი უპირატესობა იატაკის დაზიანების რისკის შემცირებაა, რადგან კედლებიდან ჩამოცვენილი მტვერი და სხვა ნაწილაკები ახლად დაგებულ იატაკს არ დააზიანებს. მეორე მიდგომის მიხედვით, ჯერ უნდა მოეწყოს იატაკი, ხოლო შემდეგ — კედლები. ამ შემთხვევაში, მიზანია, რომ იატაკის დაგებისას მძიმე ხელსაწყოების გამოყენებით კედლები არ დაზიანდეს. თუმცა, ამ დროს იატაკის დაბინძურების რისკი იზრდება.

შეარჩიეთ განათება და აქსესუარები მყუდრო ატმოსფეროს შესაქმნელად

განათება და აქსესუარები ინტერიერის დიზაინის დასკვნითი ეტაპია. ამ დროს საბოლოოდ იქმნება სასურველი ატმოსფერო და სივრცეში მაცხოვრებლების ინდივიდუალური ხასიათი შემოდის.  

განათების დაგეგმვისას აუცილებელია ფუნქციური და ესთეტიკური ასპექტების გათვალისწინება. განათების ტიპები და განლაგება უნდა შეესაბამებოდეს ოთახის დანიშნულებას და ხელს უწყობდეს მასში სასურველი განწყობის შექმნას. მაგალითად:

• ზოგადი განათება: ეს არის ოთახის ძირითადი განათება, რომელიც მთლიან სივრცეს თანაბრად ანათებს. როგორც წესი, ზოგადი განათებისთვის გამოიყენება ჭერის სანათები ან ჭაღები, რომლებიც ოთახის ცენტრშია დამონტაჟებული;
• ადგილობრივი განათება: განათება, რომელიც მიმართულია კონკრეტულ ადგილზე ან ზონაზე. მაგალითად, სანათი სამუშაო მაგიდაზე ან იატაკის სანათი სავარძლის გვერდით კითხვისთვის; 
• აქცენტირებული განათება: გამოიყენება ინტერიერის კონკრეტული დეტალების ხაზგასასმელად. მაგალითად, ნახატზე მიმართული სანათი;
• დეკორატიული განათება: ეს არის განათება, რომელიც ატმოსფეროს შესაქმნელად და განწყობისთვის გამოიყენება. მაგალითად, სანთლები, გირლანდები, ფერადი სანათები ან სპეციალური ეფექტების მქონე სანათები.

აქსესუარები ინტერიერს ავსებს და მას ინდივიდუალურობას ანიჭებს. მათი შერჩევისას მნიშვნელოვანია, დაიცვათ ოთახის საერთო სტილი, ფერთა გამა და პროპორციები. მაგალითად:

• ფარდები: უნდა შეესაბამებოდეს ოთახის სტილს და უზრუნველყოფდეს საჭირო განათებას (ბუნებრივი სინათლის გატარება ან დაბლოკვა);
• სარკეები: ვიზუალურად ზრდის სივრცეს და აუმჯობესებს განათებას, რადგან სინათლეს ირეკლავს;
• ავეჯი: უნდა იყოს ფუნქციონალური, კომფორტული და შეესაბამებოდეს ოთახის ზომებს — არ იყოს ძალიან დიდი ან პატარა;
• ნახატები და სხვა დეკორი: უნდა ასახავდეს თქვენს გემოვნებას და ავსებდეს ინტერიერს. თუმცა, არ უნდა იყოს ძალიან ბევრი, რათა სივრცე არ გადაიტვირთოს.  

შეიძლება ამდენი ეტაპი და ძალიან ბევრი დეტალი საშიშად ჩანდეს, თუმცა ეს ასე არ არის. მართალია, რომ ბინის რემონტი მრავალსაფეხურიანი პროცესია, მაგრამ მთავარია საწყის ეტაპზე ყველაფერი სწორად დაგეგმოთ და პროფესიონალები დაიხმაროთ. 

რაც მთავარია, გახსოვდეთ, რომ რემონტის ნებისმიერ ეტაპზე NOVA თქვენი საიმედო პარტნიორი იქნება. ჩვენთან შეარჩევთ დემონტაჟისთვის საჭირო ხელსაწყოებს, უმაღლესი ხარისხის პარკეტს, სანტექნიკისა და ელექტროგაყვანილობის აქსესუარებს, კედლებისა და იატაკის მოსაპირკეთებელ მასალებს. 

გვესტუმრეთ, შეიძინეთ საჭირო სარემონტო მასალები ერთ სივრცეში, დაზოგეთ დრო და აქციეთ ოცნების სახლი რეალობად.