გასაბერი თუ კარკასული აუზები — რომელია საუკეთესო არჩევანი თქვენი ოჯახისა და ბიუჯეტისთვის?

ეზოს აუზის შერჩევა, ერთი შეხედვით, მარტივი ჩანს — ირჩევ ზომას, დიზაინს და ყიდულობ. თუმცა, როდესაც საქმე რეალურ არჩევანამდე მიდის, კითხვებიც მრავლდება: გასაბერი თუ კარკასული? რა ზომა იქნება ოპტიმალური? როგორ მოვუარო და რა დამატებითი ხარჯები მექნება?

იმისთვის, რომ შენაძენმა მოლოდინი გაგიმართლოთ და ზაფხულის სასიამოვნო გამოცდილება იმედგაცრუებად არ გექცეთ, პროცესს მომზადებული უნდა შეხვდეთ. ჩვენ განვსაზღვრეთ 5 მთავარი ფაქტორი, რომელიც თქვენი ეზოს, ბიუჯეტისა და საჭიროებებზე მორგებული აუზის შერჩევაში დაგეხმარებათ.

შეარჩიეთ ოპტიმალური ლოკაცია

აუზის შერჩევის პროცესი მისი ადგილმდებარეობის განსაზღვრით იწყება. სწორად შერჩეულ ადგილას განთავსებული აუზით უფრო დიდხანს და კომფორტულად ისარგებლებთ. ამისათვის, პირველ რიგში, უნდა დარწმუნდეთ, რომ ზედაპირი იდეალურად სწორი და მყარია. ეს მოთხოვნა განსაკუთრებულად მნიშვნელოვანი კარკასული აუზისთვისაა, რადგან წყლის წნევა თანაბრად განაწილდეს და მცირედმა დახრილობებმაც კი კონსტრუქციის დეფორმაცია ან დაზიანება არ გამოიწვიოს.

ასევე, იფიქრეთ მზის ფაქტორზე. ეცადეთ, იპოვოთ ბალანსი მზიან და ჩრდილიან ზონებს შორის. თქვენს ეზოში უნდა მოძებნოთ ისეთი ადგილი, სადაც წყალი გათბება, მაგრამ აუზში ნებივრობისას მცხუნვარე მზის სხივები არ შეგაწუხებთ.

ამასთან, მოარიდეთ აუზი ხეებს, რადგან ჩამოცვენილი ფოთლები, მტვერი და მწერები წყალს დააბინძურებს და მის გასუფთავებას ძალიან გაგირთულებთ. თუ ეზოში ხეებისგან თავისუფალი ადგილის პოვნა რთულია, წყლის სისუფთავის შესანარჩუნებლად აუცილებლად გამოიყენეთ სპეციალური გადასაფარებელი ტენტი, რომელსაც აუზს ზემოდან დააფარებთ.

ადგილმდებარეობას შერჩევისას აუცილებლად გაითვალისწინეთ კომუნიკაციებთან სიახლოვე. სასურველია აუზი წყლის ონკანის სიახლოვეს დადგათ ან თუ ეს ვერ მოხერხდება, შლანგი იქონიოთ. არანაკლებ მნიშვნელოვანია ელექტროენერგიის წყარო ფილტრ-ტუმბოსთვის. დარწმუნდით, რომ ახლოს არის უსაფრთხო, წყლისაგან დაცული როზეტი.

შეაფასეთ საჭირო ზომა

შემდეგი ეტაპი აუზის ზომის განსაზღვრაა, რაც პირდაპირ უკავშირდება იმას, თუ როგორ აპირებთ მის გამოყენებას. დაფიქრდით, ვინ ისიამოვნებს აუზით ყველაზე ხშირად. თუ ის მხოლოდ პატარა ბავშვების გასართობად გჭირდებათ, კომპაქტური და არაღრმა გასაბერი აუზი კარგი და უსაფრთხო არჩევანია. თუ გინდათ, რომ მთელმა ოჯახმა ისარგებლოთ, მაშინ საშუალო ზომის კარკასული ან დიდი ზომის გასაბერი მოდელი დაგჭირდებათ, სადაც რამდენიმე ადამიანი თავისუფლად მოთავსდება.

ხოლო თუ სახლში წვეულებების მოწყობას და წყლის თამაშების გამართვას გეგმავთ, მაშინ არჩევანი დიდი ზომის, ღრმა და მტკიცე კარკასულ აუზზე უნდა შეაჩეროთ. თუმცა, თუ ფინანსური რესურსი ხელს გიწყობთ, ასეთი შემთხვევებისათვის ჩასაშენებელი აუზი საუკეთესო გამოსავალია. აქვე გეტყვით, რომ „ნოვაში“ ჩასაშენებელი აუზისთვის საჭირო ყველა მასალასა და აქსესუარს აღმოაჩენთ — ეს ტუმბოები, წყალგამძლე ფილები, განათება და ა.შ.

გათვალეთ სრული ბიუჯეტი

აუზის ბიუჯეტის დაგეგმვისას, მის ფასთან ერთად, აუცილებელი აქსესუარების ღირებულებაც გაითვალისწინეთ. გასაბერი აუზები საწყის ეტაპზე გაცილებით იაფია, ვიდრე კარკასული. თუმცა, კარკასული აუზი უფრო გამძლეა და გრძელვადიან შენაძენად ითვლება.

ბიუჯეტში აუცილებლად ჩასვით ტუმბო, რომელიც წყალს სუფთად შეინარჩუნებს. ასევე დაგჭირდებათ გადასაფარებელი ტენტი, რომელიც წყალს დაბინძურებისაგან დაიცავს. ამას დაამატეთ აუზის ძირის საფენი, საწმენდი და ქიმიური საშუალებები.

განსაზღვრეთ აუზის მოვლის საკითხი

საკუთარ აუზს რეგულარული მოვლა სჭირდება. სანამ გადაწყვეტილებას მიიღებთ, დაფიქრდით, მზად ხართ თუ არა ამისთვის. წყლის სისუფთავისთვის ფილტრი ყოველდღიურად, რამდენიმე საათის განმავლობაში უნდა ამუშაოთ. თავად ფილტრის კარტრიჯს კი პერიოდულად, დაახლოებით ორ კვირაში ერთხელ, სჭირდება გარეცხვა ან ახლით ჩანაცვლება.

მექანიკური ფილტრაციის გარდა, წყლის ქიმიურ ბალანსზეც უნდა იზრუნოთ. ეს ნიშნავს, რომ კვირაში რამდენჯერმე სპეციალური ტესტერით უნდა შეამოწმოთ წყლის მაჩვენებლები და საჭიროებისამებრ, დოზირებულად გამოიყენოთ ქლორი, pH დონის მარეგულირებლები და წყალმცენარეების საწინააღმდეგო ხსნარები. ამასთან ერთად, აუზის ზედაპირის, კედლებისა და ფსკერის გაწმენდაც ყოველდღიური რუტინის ნაწილი უნდა გახდეს.

შეაჯამეთ და შეარჩიეთ ტიპი

ზემოთ განხილული ფაქტორების შემდეგ, დროა, საბოლოო არჩევანი გააკეთოთ. გასაბერი აუზის უპირატესობა მისი ხელმისაწვდომი ფასი, სწრაფი მონტაჟი და კომპაქტურობაა. სეზონის ბოლოს მას მარტივად დაცლით, გააშრობთ და პატარა ყუთში შეინახავთ. ის იდეალურია მათთვის, ვისაც მცირე სივრცე აქვს.

მეორე მხრივ, კარკასული აუზი უფრო მტკიცეა, ზომებისა და სიღრმის მეტი არჩევანი აქვს და უფრო გრძელვადიან შენაძენად ითვლება. კონსტრუქციისა და მოცულობის წყალობით, ის უფრო მოგაგონებთ ჩაშენებულ აუზში ცურვას.

ამ საკითხის განსასაზღვრად შეაფასეთ თქვენი პრიორიტეტები და შეარჩიეთ მოდელი, რომელიც თქვენს სურვილებსა და საჭიროებებს ყველაზე მეტად მოერგება.

შეხვდით ზაფხულის ცხელ დღეებს მომზადებული — ეწვიეთ „ნოვას“ ფილიალებს ან ვებგვერდს Nova.ge, სადაც გასაშლელი და გასაბერი აუზების დიდი არჩევანი დაგხვდებათ.