როგორ უნდა გამოიყენოთ ბაღის ხელსაწყოები უსაფრთხოდ და ეფექტურად — რჩევები Nova-სგან

სანამ ბაღში სამუშაოდ გაემართებოდეთ და ხელსაწყოებს მოიმარჯვებდეთ, მანამდე აუცილებლად დაფიქრდით თქვენს უსაფრთხოებაზე. ბუნებასთან სიახლოვე და მცენარეებზე ზრუნვა განტვირთვის საუკეთესო საშუალებაა, მაგრამ ეს პროცესი ბევრად სასიამოვნოა, როცა უსაფრთხოდ ხართ. 

იმისათვის, რომ ეს პროცესი გაუთვალისწინებელი უსიამოვნებებისაგან მაქსიმალურად დაზღვეული იყოს, აუცილებელია ბაღის ხელსაწყოები სწორად გამოიყენოთ და უსაფრთხოების წესები დაიცვათ, რომლებსაც დეტალურად ამ ბლოგში გიზიარებთ.

გავრცელებული ბაღის ხელსაწყოები და მათი უსაფრთხო გამოყენების წესები

მიუხედავად იმისა, რომ თითოეულ იარაღს თავისი სპეციფიკა აქვს, არსებობს მიდგომები, რომლებიც ნებისმიერ მათგანთან მუშაობას უფრო უსაფრთხოს და ეფექტურს გახდის.

მაგალითად, ისეთი მჭრელი იარაღებით — ხერხი, სეკატორი, ცული — მუშაობისას, უმთავრესი პირობაა, რომ მათი პირები ბასრი იყოს. ეს პირდაპირ კავშირშია უსაფრთხოებასთან, რადგან ბასრი იარაღი ნაკლებ ძალისხმევას მოითხოვს და, შესაბამისად, ნაკლებად სახიფათოა.  ამასთან, ყოველთვის აკონტროლეთ მჭრელი პირის მოძრაობის ტრაექტორია და დარწმუნდით, რომ ხელები და სხეულის დანარჩენი ნაწილების უსაფრთხო მანძილზეა და გაჭრის ან დარტყმის საშიშროება არ არის. 

ელექტრო იარაღები, სიმძლავრისა და მუშაობის სისწრაფის გამო, განსაკუთრებულ ყურადღებას და მომზადებას მოითხოვს. სანამ მუშაობას დაიწყებთ, აუცილებელია, კარგად გაეცნოთ კონკრეტული მოდელის ინსტრუქციას, რათა თავიდან აიცილოთ პოტენციური საფრთხეები. მაგალითად, ელექტრო ხერხის გამოყენებისას ყველაზე დიდი საფრთხე ე.წ უკუდარტყმაა. ეს ძირითადად მაშინ ხდება, როცა მოწყობილობის ბრტყელი წინა ზედა კუთხე უეცრად მაგარ ზედაპირს ეხება. შედეგად ხერხი უკონტროლო მოძრაობას იწყებს და უკან აისხლიტება. რაც შეეხება ბალახის ტრიმერს, ამ შემთხვევაში საფრთხე მბრუნავი თავის (ძაფის ან დანის) მიერ მყარი ნაწილაკების — პატარა ქვები, ხის ნაჭრები ან სხვა ნარჩენები — დიდი სისწრაფით ასხლეტაა.   შედეგად შესაძლოა დაზიანდეთ თქვენც, გარშემო მყოფებიც და ახლო მდებარე საგნებიც.

სეკატორი, ანუ ბაღის მაკრატელი, ერთი შეხედვით მარტივი იარაღია, თუმცა მისი გამოყენებისას უსაფრთხოების რამდენიმე წესის დაცვა აუცილებელია. უპირველეს ყოვლისა, მუშაობისას ყოველთვის დააკვირდით თქვენს მეორე ხელს.  გაჭრის საფრთხის თავიდან ასაცილებლად, დარწმუნდით, რომ ის მჭრელი პირისაგან მოშორებით, უსაფრთხო ადგილას გიჭირავთ. ასევე, აუცილებლად გამოიყენეთ ხელთათმანები, რომლებიც არა მხოლოდ ბასრი პირებისგან, არამედ მცენარის ეკლებისაგანაც დაგიცავთ.

ცულით მუშაობა განსაკუთრებულ ყურადღებასა და უსაფრთხოების წესების ზუსტ დაცვას მოითხოვს. სანამ ამ მეტად ბასრ იარაღს მოიქნევთ, მანამდე შექმენით უსაფრთხო სამუშაო ზონა: დარწმუნდით, რომ თქვენ გარშემო საკმარისი თავისუფალი სივრცეა და ცულის მოქნევის ტრაექტორიას წინ არაფერი ეღობება.  მაგალითად, ხის ტოტი არ უნდა გიშლიდეთ ხელს, რადგან მას დარტყმის მიმართულების შეცვლა შეუძლია, მიწაზე კი არ უნდა იყოს დიდი ზომის ქვები, მეტალის ნივთები ან სხვა დაბრკოლებები, რომლებიც პოტენციურად წონასწორობას დაგაკარგვინებთ.

ბაღში ნიჩბებისა და ბარების გამოყენებისას ორი მთავარი წესი უნდა დაიცვათ: ზურგის უეცარი დაზიანება და მიწისქვეშა კომუნიკაციების გაჭრა. ზურგის ტკივილის თავიდან ასაცილებლად, გახსოვდეთ, რომ ყველაზე ხშირად ტრავმას იწვევს წელის არასწორი მოძრაობა. როდესაც ამოღებული მიწა გადაგაქვთ, არასდროს შეტრიალდეთ მხოლოდ წელით — ეს ზურგის კუნთებსა და მალებს აზიანებს. ამის ნაცვლად, გადადგით ნაბიჯი და მთელი სხეულით მიტრიალდით.

რაც შეეხება მეორე და კიდევ უფრო სერიოზულ საფრთხეს, ის მიწისქვეშა კომუნიკაციებს უკავშირდება. თუ არსებობს შესაძლებლობა, წინასწარ გაარკვიეთ, ხომ არ გადის თქვენს ბაღში წყლის, გაზის ან სხვა რაიმე კომუნიკაცია. 

რაზე უნდა ვიზრუნოთ მუშაობის დაწყებამდე?

სანამ უშუალოდ ხელსაწყოების გამოყენების წესებზე გადავალთ, მოდით, იმ ზოგად პრინციპებს გავეცნოთ, რომლებიც ბაღში მუშაობას ბევრად უსაფრთხოს და კომფორტულს გახდის. 

სანამ ბაღში მუშაობას დაიწყებდეთ, მნიშვნელოვანია დარწმუნდეთ, რომ გაქვთ საჭირო დამცავი აღჭურვილობა. ყველა სამუშაოს თავისი შესაფერისი აღჭურვილობა სჭირდება. მაგალითად, ელექტროხერხებთან ან ბალახის ტრიმერებთან მუშაობისას, რომლებიც ნარჩენებს მაღალი სიჩქარით ისვრის, უსაფრთხოების სათვალესთან ერთად სახის სრული ფარი დაგჭირდებათ. ხელთათმანები კი უნივერსალური დამცავია — გამოიყენებთ ხერხვის დროს, ეკლიან მცენარეებთან და მიწასთან მუშაობისას ან ქიმიკატებთან შეხებისას. ამით კი ჭრილობებს, კანის გაღიზიანებასა და ნიადაგის პათოგენებთან კონტაქტს აიცილებთ თავიდან. 

ბაღში მუშაობისას ერგონომიკის დაცვაც ისეთივე მნიშვნელოვანია, როგორც დამცავი აღჭურვილობის გამოყენება. სწორი მიდგომით სხეულის ზედმეტ დატვირთვასა და შესაძლო ტრავმებს აირიდებთ თავიდან. მაგალითად, როცა მიწასთან ახლოს მუშაობთ, ბალახს კრეჭთ, ყვავილს რგავთ ან ნიადაგს ანოყიერებთ, მოხრის ნაცვლად მუხლებზე დაიჩოქეთ, რადგან ნაკლებ სიმძიმესა და დატვირთვას იგრძნობთ. სიმძიმეების აწევისას, ზურგი სწორ პოზიციაში დაიკავეთ და ტვირთი სხეულთან ახლოს დაიჭირეთ. თუკი მძიმე ნივთებს ერთი ადგილიდან მეორეზე ამ რჩევის გათვალისწინებით გადაიტანთ, მთელი დატვირთვა ფეხის კუნთებს მიემართება, ზურგი ნაკლებად აგტკივდებათ და ხერხემლის ტრავმების პრევენციასაც მოახდენთ.

მიუხედავად ბაღის გარშემო დამკვიდრებული სიმშვიდისა, ზოგჯერ შეიძლება მოულოდნელი საფრთხის წინაშე აღმოჩნდეთ. ამიტომ, ბაღის ხელსაწყოების გამოყენების პარალელურად, აუცილებელია, გარემო ფაქტორებსაც მიაქციოთ ყურადღება. მაგალითად, ძლიერი შტორმის მოახლოებისას, გახსოვდეთ, რომ მეხი ეპიცენტრიდან საკმაოდ დიდ მანძილზე, დაახლოებით 16 კმ. რადიუსშიც კი შეიძლება დაეცეს.

განსაკუთრებული ყურადღება გამოიჩინეთ მცენარისა და ნიადაგის დაცვის საშუალებებთან მუშაობისას — აუცილებლად ზედმიწევნით მიჰყევით ეტიკეტზე დატანილ რეკომენდაციებს.

გაფრთხილება: არასდროს დაწვათ შხამიანი მცენარეები, რადგან კვამლი ჰაერს აბინძურებს და შეიძლება სერიოზული რესპირატორული პრობლემების გამომწვევი მიზეზი გახდეს. ამასთან, ყურადღებით იყავით მწერებთან, რომლებსაც სხვადასხვა დაავადებები გადააქვთ. ამიტომ, გამოიყენეთ რეპელენტი და ბაღში ფუსფუსის შემდეგ, სხეული ყურადღებით დაითვალიერეთ.

დაბოლოს, ერთ-ერთი ყველაზე კრიტიკული, თუმცა ხშირად უგულებელყოფილი საფრთხე მიწისქვეშა კომუნიკაციებია. ნებისმიერი გათხრითი სამუშაოს მიმდინარეობისას, თუნდაც სულ პატარა ორმოს ჭრიდეთ, იფრთხილეთ მიწისქვეშა გაყვანილობებთან, მაგალითად, წყლისა და გაზის მილებთან.  

ბაღის ხელსაწყოების მოვლა ხანგრძლივი და უსაფრთხო გამოყენებისათვის გამოყენებისათვის

კარგად მოვლილი იარაღი არა მხოლოდ უფრო დიდხანს გემსახურებათ, არამედ უფრო უსაფრთხოცაა და უფრო ეფექტურადაც ასრულებს თავის ფუნქციას. მაგალითად, დაზიანებული ან ბლაგვი ბაღის ხელსაწყო უფრო მეტ ძალისხმევას საჭიროებს და ტრავმის რისკს ზრდის. სწორედ ამიტომ, ბაღის ხელსაწყოები მუდმივ ყურადღებასა და მოვლას საჭიროებს, რაც რამდენიმე ძირითად პრინციპს ემყარება, ესენია: გაწმენდა, გალესვა და მექანიკური დეტალების მოვლა. 

როგორც ითქვა, მოვლის პირველი და ყველაზე მნიშვნელოვანი ნაბიჯი გაწმენდაა. ყოველი გამოყენების შემდეგ იარაღების მიწისაგან, მცენარის ნარჩენებისა და ტენისგან გაწმენდა, მათ ჟანგისაგან იცავს. მაგალითად, ნიჩბების შემთხვევაში უბრალოდ მიწისაგან გასუფთავება და მშრალ ადგილას შენახვაა საჭირო. სეკატორებისათვის აუცილებელია პირების პერიოდული დეზინფექცია, რათა ერთი მცენარის დაავადებები მეორეზე არ გავრცელდეს.

მუდმივად გახსოვდეთ, რომ ბასრი იარაღი უსაფრთხო იარაღია. გალესვისას კონკრეტული იარაღის სპეციფიკა უნდა იცოდეთ. მაგალითად ცულის გალესვისას, მთავარია მისი პირის დახრის კუთხე არ შეცვალოთ. ამისათვის, ცული კარგად დააფიქსირეთ და გასალესი ქლიბი ცენტრიდან პირისაკენ თანაბრად ამოძრავეთ. შემდეგ იგივე გაიმეორეთ ცენტრის მეორე მხარეს.  მთავარია, ორივე მხარე თანაბრად დამუშავდეს, რათა ცული ერთნაირად ბასრი იყოს.

ბოლო პრინციპია მექანიკური დეტალებისა და სპეციფიკური ნაწილების მოვლა. ეს გულისხმობს მოძრავი ნაწილების შეზეთვასა და სამაგრი დეტალების (ხრახნები, ჭანჭიკები) შემოწმებას.  ეს განსაკუთრებით მნიშვნელოვანია რთული კონსტრუქციის მქონე ბაღის ხელსაწყოებისთვის.  მაგალითად, ელექტრო ხერხების შემთხვევაში, ყოველი გამოყენების წინ აუცილებელია ზეთის ავზის შემოწმება და შევსება, რათა ჯაჭვი სათანადოდ იპოხებოდეს. 

მებაღეობა მართლაც მეტად სასიამოვნო საქმიანობაა, როცა იცით, როგორ იმუშაოთ უსაფრთხოდ და ეფექტურად.