წარმოება - კატალოგი
სახელმძღვანელო
ბეტეკის კატალოგი
კონდიციონერის შეძენისას მთელ ყურადღებას ბრენდსა და მოწყობილობების მახასაითებლებს ვუთმობთ. თუმცა, ზოგჯერ ერთი მნიშვნელოვანი ფაქტორი, მონტაჟის ხარისხი, გვავიწყდება. აშშ-ის ენერგეტიკის დეპარტამენტის კვლევამ აჩვენა, რომ ახლად დამონტაჟებული სისტემების 90%-მდე მწარმოებლის მიერ განსაზღვრული სიმძლავრით ვერ მუშაობდა, რაც არასწორი მონტაჟით იყო განპირობებული.
ეს ნიშნავს, რომ სისტემა ენერგიას გადაჭარბებულად მოიხმარს, მისი კომპონენტები ნაადრევად გამოდის მწყობრიდან, ზოგ შემთხვევაში კი, სითხე ჟონავს და სახლს ზიანი ადგება.
შეცდომა №1: არასწორად შერჩეული სიმძლავრე
ხელოსნები კონდიციონერის სიმძლავრეს ძალიან ხშირად არასწორად განსაზღვრავენ. ისინი ფიქრობენ, რომ მოწყობილობების მახასიათებლები მხოლოდ ოთახის ფართობის მიხედვით უნდა განისაზღვროს, ეს კი არასწორი მიდგომაა.
კონდიციონერის სიმძლავრე კედლებისა და ჭერის იზოლაციის, შენობის ჰერმეტულობის, რეგიონისთვის დამახასაითებელი ტემპერატურის, ტენისა და ჰორიზონტის მხრის გათვალისწინებით უნდა განისაზღვროს.
ზედმეტად მძლავრი კონდიციონერი სივრცეს სწრაფად გააგრილებს, თუმცა მისი ძრავა მალევე გამოირთვება და ჰაერიდან ნესტის გატანას ვერ მოასწრებს. ამის გამო, არასასიამოვნო ჰაერი იქნება.
მეორე მხრივ, საჭიროზე სუსტი მოდელი მუდმივად მაქსიმალური სიმძლავრით იმუშავებს, სივრცეს კარგად მაინც ვერ გააგრილებს, ზედმეტ ენერგიას დახარჯავს და ნაადრევად გამოვა მწყობრიდან.
შეცდომა №2: დაზიანებული სავენტილაციო სისტემა
ხშირად, ახალ კონდიციონერს ძველ სავენტილაციო მილებზე ისე აერთებენ, რომ მათ მდგომარეობას არ ამოწმებენ. ეს დიდი შეცდომაა, რადგან დაზიანებული მილები ახალი სისტემის ეფექტურ მუშაობას ხელს უშლის.
თუ მილები დაზიანებულია, გაგრილებული ჰაერის დაახლოებით 20% ოთახში შესვლამდე დაიკარგება. ამიტომ, ახალი კონდიციონერის დამონტაჟებამდე, უნდა შემოწმდეს მილების მდგომარეობა და საჭიროების შემთხვევაში გამოიცვალოს სავენტილაციო სისტემა.
გარდა ამისა, დაზიანებულ მილებში მტვერი, ობის სპოტები და სხვა დამბინძურებლები ხვდება, რომლებიც შემდგომ მთელ ოთახში ვრცელდება და ჯანმრთელობას საფრთხეს უქმნის.
შეცდომა №3: სადრენაჟო სისტემის არასწორად მოწყობა
კონდიციონერი მუშაობისას ჰაერიდან დიდი რაოდენობით ნესტს იღებს, რომელიც წყლად, ანუ კონდენსატად გარდაიქმნება. არასწორად მოწყობილი სადრენაჟო სისტემა ამ წყლის დაგუბებას იწვევს, რასაც, შესაძლოა, კედლებისა და ჭერის დაზიანება, ობის გავრცელება და უსიამოვნო სუნი მოჰყვეს.
ამ პრობლემიდან გამოსავალი სწორად დაგეგმილი სადრენაჟო სისტემაა. პირველ რიგში, სადრენაჟო მილს, სისტემიდან წყლის გამოსადევნად, საკმარისი დახრა უნდა ჰქონდეს.
ყველაზე მნიშვნელოვანი კი ავარიული გამომრთველის არსებობაა. ეს პატარა მოწყობილობა მილის გაჭედვის ან სითხის გაჟონვის შემთხვევაში, ავტომატურად თიშავს კონდიციონერს.
შეცდომა №4: თერმოსტატის არასწორი მდებარეობა
კონდიციონერის ეფექტურობას თერმოსტატის მდებარეობაც განსაზღვრავს. ის თუ მზის სხივების ქვეშ ან სითბოს სხვა წყაროსთან, ნათურასთან ან ტელევიზორთან, ახლოსაა დამონტაჟებული, ხელოვნურად გათბება და ჩათვლის, რომ ოთახში რეალურზე მაღალი ტემპერატურაა. ამის გამო, კონდიციონერი მაღალი სიმძლავრით იმაზე დიდხანს იმუშავებს, ვიდრე ეს საჭიროა.
იდეალურ შემთხვევაში, თერმოსტატი უნდა განთავსდეს ცენტრალურ, აქტიურად გამოყენებად სივრცეში, მაგალითად, მისაღებში. ასეთ ადგილას ჰაერი კარგად მოძრაობს და თერმოსტატი, რომელიმე იზოლირებული კუთხის ან დერეფნის ნაცვლად, მთლიანი სივრცის საშუალო ტემპერატურას ზომავს.
შეცდომა №5: გარე ბლოკის განთავსება მზის ქვეშ
კედლის კონდიციონერების გარე ბლოკს ოთახიდან სითბო გარეთ გამოაქვს და მას შედარებით გრილ ჰაერს უერთებს. გარე ბლოკი თუ მზის პირდაპირი სხივების ქვეშ დგას, მის ირგვლივ ჰაერი ძალიან ცხელი იქნება. ამის გამო ის შიდა სივრცეში შეგროვებულ სითბოს გარეთ ეფექტურად ვეღარ გამოიტანს, რადგან მის გარშემო ჰაერი იმდენად ცხელი იქნება, რომ დამატებით სითბოს ვეღარ მიიღებს. ამის გამო, სისტემა იძულებულია, გაცილებით დიდხანს იმუშაოს, რათა სითბო ნელ-ნელა გამოიტანოს.
ამ პრობლემის ასაცილებლად, გარე ბლოკი შენობის იმ მხარეს უნდა დამონტაჟდეს, სადაც დღის ყველაზე ცხელ პერიოდშიც კი ჩრდილია. თუ ეს შეუძლებელია, ეფექტური იქნება ხელოვნურად, მაგალითად, სპეციალური დამცავი ტენტით, შექმნილი ჩრდილიც.
შეცდომა №6: ფრეონის არასწორი რაოდენობა
კონდიციონერში ფრეონის საჭირო რაოდენობას მწარმოებელი ადგენს. მისი რაოდენობა უცვლელი უნდა იყოს, მაგრამ თუ მცირდება, მაშინ სისტემის რომელიღაც მონაკვეთი ჟონავს. შესაბამისად, პრობლემის გადაჭრისათვის, ფრეონის დამატების ნაცვლად, უნდა მოიძებნოს გაჟონვის ადგილი და შეკეთდეს ის.
ფრეონის სიჭარბემ შესაძლოა მოწყობილობა დააზიანოს. როგორც სითხის ნაკლებობა, ისე ზედმეტი რაოდენობა გაგრილების ხარისხს აუარესებს და კომპრესორის გადახურებასა და გადატვირთვას იწვევს, საბოლოოდ კი მწყობრიდან გამოჰყავს ის.
ამიტომ, პროფესიონალმა ხელოსანმა ზუსტად უნდა განსაზღვროს ფრეონის რაოდენობა და არ უნდა მიენდოს ინტუიციას ან თვალის ზომას.
შეცდომა №7: კონდენსატორისთვის არასაკმარისი სივრცე
კონდიციონერის გარე ბლოკს, სითბოსგან გასათავისუფლებლად, ჰაერის მუდმივ ნაკადს საჭიროებს. მისი ვენტილატორი ჰაერს გვერდებიდან ისრუტავს, გასაგრილებლად სისტემაზე ატარებს და შემდეგ ცხელ ნაკადს ვერტიკალურად გამოდევნის.
სწორედ ამიტომ, აუცილებელია, რომ გარე ბლოკსა და ნებისმიერ დაბრკოლებას შორის თავისუფალი სივრცე, დაახლოებით 60 სმ, დარჩეს. წინააღმდეგ შემთხვევაში, თუ ბლოკი რაიმესთან ძალიან ახლოს დამონტაჟდება, ის ჰაერს საკმარისი რაოდენობით ვეღარ მიიღებს და სითბოს გამოსაყოფად უფრო მეტი მუშაობა დასჭირდება.
რჩევები ხარისხიანი მონტაჟისთვის
იმისთვის, რომ დარწმუნდეთ მონტაჟის მაღალ ხარისხში, გაითვალისწინეთ შემდეგი რჩევები:
- ხელოსნის შერჩევისას, პრიორიტეტი მიანიჭეთ მის კვალიფიკაციას. ჰკითხეთ, როგორ მიდგომებს
- იყენებს ისეთი მნიშვნელოვანი ამოცანების შესასრულებლად, როგორებიცაა: სიმძლავრის გამოთვლა, მილების შეერთება და ფრეონის რაოდენობის განსაზღვრა. თუ მისგან პროფესიონალურ, დეტალურ და თავდაჯერებულ პასუხს მიიღებთ, მაშინ ის ნამდვილად კომპეტენტურია ამ საქმეში;
- დარწმუნდით, რომ სიმძლავრის შერჩევა ხდება დეტალური ანალიზის საფუძველზე. სანამ ხელოსანი მუშაობას შეუდგება, გამოიკითხეთ, თუ როგორ გეგმავს სიმძლავრის შერჩევას. როგორც ბლოგში განვიხილეთ, ის უნდა ითვალისწინებდეს არა მხოლოდ ფართობს, არამედ ფანჯრების მდებარეობას, კედლების იზოლაციას და სხვა ინდივიდუალურ ფაქტორებს;
- დააკვირდით გამოყენებულ მასალებს. მაგალითად, დააზუსტეთ, რომ სავენტილაციო მილების დასალუქად გამოყენებული იქნება სპეციალური, გამძლე მასალა და არა — ჩვეულებრივი წებოვანი ლენტი, რომელიც ტემპერატურის ცვლილებისას მალევე კარგავს ეფექტურობას;
- ნუ დაამონტაჟებთ კონდიციონერს დამოუკიდებლად. გარდა იმისა, რომ მოწყობილობა ნაკლებად ეფექტურად შეასრულებს თავის ფუნქციას, ეს შეიცავს უსაფრთხოების სერიოზულ რისკებსაც.
საბოლოო ჯამში, კონდიციონერის ეფექტური მუშაობა დამოკიდებულია არა იმდენად ბრენდზე, რამდენადაც მონტაჟის ხარისხზე, სადაც ყველაზე მცირე დეტალსაც კი შეუძლია, სერიოზული გავლენა მოახდინოს თქვენს კომფორტზე.
მას შემდეგ, რაც ,,ნოვაში" მაღალი ხარისხის კონდიციონერს შეარჩევთ, შემდეგ მაღალი კვალიფიკაციის ხელოსანი უნდა მოძებნოთ. გამოიყენეთ ამ სტატიაში მიღებული რჩევები, რათა დარწმუნდეთ, რომ თქვენი შენაძენი საიმედო ხელშია და წლების განმავლობაში ეფექტურად იმუშავებს.
