როგორ მოვამზადოთ სახლი ზაფხულისთვის: თბოიზოლაცია, კონდიციონერი და სწორი მონტაჟი

ზაფხულისთვის მომზადება სახლში, ჩვეულებრივ, კონდიციონერის ჩართვით იწყება. თუმცა სიცხე კედლიდანაც შემოდის და ამას მომხმარებლების ნაწილი ყურადღებას არ აქცევს. სწორედ ამიტომ, ზოგი ოთახი კონდიციონერის დახმარებითაც ვერ გრილდება: კედელი სიცხეს მაინც აბრუნებს. ამ ბლოგში სამ კითხვას ვუპასუხებთ: როგორ ხდება კედლის თბოიზოლაცია? რომელი კონდიციონერი სჯობს? და რას გულისხმობს სტანდარტული მონტაჟი?

ფასადის თბოიზოლაცია: რატომ კედელი

ზაფხულში კედელი მზის სხივებს მთელი დღის განმავლობაში შთანთქავს. საღამოს ეს სითბო ოთახში გადაინაცვლებს, სწორედ მაშინ, როცა ყველაზე მეტად უნდა გრილოდეს. ფასადის თბოიზოლაცია ამ პროცესს ანელებს: კედელი ნაკლებად თბება, შესაბამისად – ოთახიც.

ეს ორმხრივი სარგებელია. ზამთარში იგივე შრე სახლის შიგნით გაჩენილ სითბოს ინარჩუნებს და გათბობის ხარჯი მცირდება. ფასადის სწორი მოწყობა, შესაბამისად, არა ზაფხულისთვის, არამედ მთელი წლისთვის საჭირო, სწორი გადაწყვეტილებაა.

თბოიზოლაციის სისტემა რამდენიმე შრისაგან შედგება. პირველი – ნალესის შემავსებელი გრუნტი, რომელიც კედლის ზედაპირს ამზადებს და მის შეწოვის უნარს ამცირებს. შემდეგ მოდის საკუთრივ საიზოლაციო მასალა, რომელიც ყველაზე მნიშვნელოვანი შრეა. სამშენებლო მასალების მაღაზია “ნოვაში” სამ ძირითად ვარიანტს შეხვდებით.

ქვაბამბა ბოჭკოვანი მასალაა, რომელიც, სითბოს გარდა, ხმასაც იკავებს. ის ცეცხლგამძლეა და კედელს „სუნთქვის" საშუალებას აძლევს, რაც ნესტის დაგროვებას ხელს უშლის. სახლებისთვის, სადაც ხმის იზოლაციაც საჭიროა, ქვაბამბა ორ პრობლემას ერთდროულად ჭრის.

XPS პოლისტიროლის ექსტრუზირებით დამზადებული მასალაა. მკვრივი სტრუქტურა მას ტენის მიმართ განსაკუთრებით მედეგს ხდის, ამიტომ ხშირად ნოტიო კლიმატის ან სარდაფის კედლებისთვის გამოიყენება.

EPS, ანუ პენოპლასტი ექსპანდირებული პოლისტიროლია. მის შიგნით არსებული ჰაერი სითბოს გატარებას ხელს უშლის – ზამთარში სითბოს ინახავს, ზაფხულში კი სიგრილეს. ის ქვაბამბასთან შედარებით მსუბუქია და საცხოვრებელ შენობებში ფართოდ გამოიყენება. 

მასალის არჩევა კედლის ტიპზე, ნესტიანობასა და ფასადის მდებარეობაზეა დამოკიდებული. ამ გადაწყვეტილების მისაღებად უმჯობესია კონსულტაცია, რადგან სხვადასხვა მასალა სხვადასხვა სახლისთვის გამოდგება.

საიზოლაციო მასალის დამაგრება დუბელებით ხდება, ზედაპირი კი ფითხით მუშავდება. ფითხის გასამყარებლად არმირებული მინაბოჭკოვანი ბადე გამოიყენება. სწორედ ის უშლის ხელს ნაპრალების გაჩენას. ბოლო შრეებია გრუნტი, დეკორატიული ფითხი და ფასადის საღებავი, რომელიც კედელს ატმოსფერული ნალექებისგან იცავს. კუთხეებზე პლასტმასის პროფილი მაგრდება – ნაპრალებისთვის ყველაზე გავრცელებული ადგილი სწორედ კუთხეებია.

კონდიციონერი: ინვერტორული თუ ჩვეულებრივი

კონდიციონერის ყიდვისას ერთ-ერთი პირველი კითხვაა, ინვერტორული კონდიციონერი უნდა ავირჩიოთ თუ ჩვეულებრივი. განსხვავება კომპრესორის მუშაობის პრინციპშია და ეს სხვაობა პრაქტიკაშიც ადვილად შესამჩნევია.

ჩვეულებრივი, არაინვერტორული კონდიციონერი ერთი სიჩქარით მუშაობს. ოთახი სასურველ ტემპერატურამდე გაციების შემდეგ კომპრესორი გამოირთვება. ტემპერატურა კვლავ მოიმატებს და კომპრესორი ისევ ჩაირთვება. ეს ციკლი მუდმივად მეორდება. ყოველი ჩართვა ელექტროენერგიის მოხმარების მოკლევადიან ზრდას იწვევს. ამასთან, ოთახის ტემპერატურა ყოველ ჯერზე იზრდება და ისევ ეცემა. 

ინვერტორული კონდიციონერი სხვაგვარად მუშაობს. კომპრესორი არ ირთვება და არ ითიშება, ის მხოლოდ სიჩქარეს ცვლის. ოთახი სწრაფად გაცივდება, შემდეგ კომპრესორი დაბალ რეჟიმში გადადის და ტემპერატურას ინარჩუნებს. ელექტროენერგიის ხარჯი ამ პრინციპის გამო უფრო ცოტაა. მონაცემებით, ინვერტორული კონდიციონერი 30 პროცენტამდე ნაკლებ ელექტროენერგიას მოიხმარს.

კომფორტის თვალსაზრისითაც, სხვაობა იგრძნობა. ინვერტორული კონდიციონერი ოთახს უფრო თანაბარ ტემპერატურაზე ინარჩუნებს. ხმაური კი ნაკლებია – კომპრესორი მაღალ სიჩქარეს მხოლოდ მუშაობის პირველ წუთებში იყენებს. ეს საძინებლისთვის განსაკუთრებით მნიშვნელოვანია.

არაინვერტორული კონდიციონერი შეძენის ეტაპზე ნაკლებ ხარჯს მოითხოვს. თუ გამოყენება ყოველდღიური და ინტენსიურია, სხვაობა კომუნალურ გადასახადებში დროთა განმავლობაში გამოჩნდება.

ამ გადაწყვეტილებაში ოთახის ზომაც მნიშვნელოვან როლს თამაშობს. დიდ სივრცეში ინვერტორული კონდიციონერი ტემპერატურას უფრო სტაბილურად ინარჩუნებს. პატარა ოთახში ეს სხვაობა ნაკლებად შესამჩნევია. თუ გაგრილება გჭირდებათ, მაგრამ კონდიციონერის ყიდვას ჯერ არ გეგმავთ, ვენტილატორის ყიდვა ზაფხულისთვის შეიძლება, დროებით კარგი გამოსავალი იყოს.

კედლის კონდიციონერის მონტაჟი: რა შედის სტანდარტულ სერვისში

კონდიციონერის შეძენა მონტაჟის გარეშე წარმოუდგენელია. ამ ეტაპს მომხმარებლების ნაწილი ნაკლებ ყურადღებას აქცევს და ეს შემდგომ პრობლემებად იქცევა. არასწორად დამონტაჟებული კონდიციონერი ნაკლებ ეფექტიანად მუშაობს, მეტ ენერგიას მოიხმარს და მისი გამოყენების ვადაც მცირდება.

კედლის კონდიციონერის მონტაჟი,საყოფაცხოვრებო ტექნიკის შეძენისას, სტანდარტულად მოიცავს: 40 სმ. სისქის აგურის ან ბლოკის კედლის გახვრეტას – ეს სტანდარტული კედლისთვის მოქმედებს. ცივი ბეტონი, რიგელი ან მონოლითი ამ კატეგორიაში არ ხვდება. გარე აგრეგატი კრონშტეინზე მაგრდება. შიდა და გარე ბლოკები ერთმანეთს 3 მეტრის რადიუსში უკავშირდება. ბოლოს – დენის წყაროსთან მიერთება და სატესტო რეჟიმში ჩართვა, 

თუ მონტაჟი ამ პარამეტრებს სცდება, კედელი სხვა ტიპისაა ან ბლოკებს შორის დაშორება 3 მეტრს აღემატება, ეს არასტანდარტულ მონტაჟს მოითხოვს. ასეთ შემთხვევაში პირობები ადგილზე, მემონტაჟესთან უნდა შეთანხმდეს. სამონტაჟო მასალების ფასი ბაზარზე ცვლადია, ამიტომ მონტაჟის საბოლოო თანხა წინასწარ ზუსტად ვერ განისაზღვრება.

სამი საკითხის – იზოლაციის, კონდიციონერისა და მონტაჟის – განცალკევება ხშირად შეცდომაა. კედელი, რომელიც სითბოს ინახავს, კონდიციონერს ბევრად მეტ სამუშაოს აკისრებს. კარგი კონდიციონერი ცუდი მონტაჟით ვერ მუშაობს სრული შესაძლებლობით. 

ზაფხულისთვის მომზადება სახლში ამ სამი ნაბიჯის გათვალისწინებით იწყება. მშენებლობისა და რემონტის მიმართულებით „ნოვა" ამ პროცესის თითოეულ ეტაპზე – ფასადის მასალებიდანსაყოფაცხოვრებო ტექნიკამდე – შესაბამის პროდუქტს გთავაზობთ. შერჩევაში დასახმარებლად კი „ნოვას" გუნდი კონსულტაციისთვის მზადაა.